Par Godson Sériphin
Se yon bagay ki te konn ap pale an kachkach mimi, plizyè moun konn tante di sa, men sètfwasi, se yon jounal anglè ki rele «The Guardian» ki pibliye yon ankèt semèn sa ki pale sitou de temwayaj yo rekeyi sou dosye sa.
Ranch Kwadèboukè a ki se basyon foutbòl pa bò isit depi kèk bon lane, gen anpil kritik kap tonbe sou li depi yon bon ti tan. Pafwa se pou zafè jesyon lajan pafwa se pou trètman jwè ak jwèz yo andedan ranch lan. Men fwa sa, twa (3) jounalis k’ap travay pou jounal sosyal-liberalis ‘’The Guardian’’ pa twò lontan kap gen 200 lane depi li egziste, abouti ak yon ankèt ki genyen plizyè temwen ki bay kòman sa konn ye e eseye eksplike kèk move sitiyasyon tankou abi seksyèl ki konn fèt sou timoun yo nan ranch lan, fason atlèt yo ap viv andedan an ki pa imen ditou. Selon ankèt sa, gen timoun yo konn abize nan zafè sèks andedan an e ta sanble genyen menm ki konn rive fè avòtman daprè temwen yo.
Dadou Jean Bart, prezidan FHF la, bò kote pa li demanti e voye jete tout akizasyon ak lòt vye pawòl ki ta ka fè yo konsidere li kòm yon bouwo e toujou selon li menm, se pou sal imaj li ak fanmi li e tou, pou destabilize federasyon l’ap dirije a depi nan lane 2000. Li menm di, si gen yon jwè ou jwèz ki sibi agresyon seksyèl, federasyon an ankouraje yo pran chimen lajistis e prè pou li kanpe ak yo paske li menm tou l’ap goumen kont move pratik sa yo.
Èske prezidan an konte pote plent pou jounal sila a? Èske yon jounal ki gen renome mondyal konsa ap pibliye nenpòt bagay sitou lè nou konnen yonn nan jounalis anketè yo se redaktè anchèf adjwen jounal sila a? Fòk nou di tou, èske enstans ki la pou fè respekte dwa timoun yo ap foure bouch nan sa? Antouka, gen plas pou anpil kesyon poze toujou, men ann ret tann pou nou wè kòman sa ap fini paske se pa yon ti zafè.
