Par Yvelande Hilaire
Jou ki te Jedi 30 Avril la, yon eskandal pete aprè ke youn nan jounal ki pi puisan nan mond lan “The Guardian” ta soti yon atik kote 3 anketè fè konnen ke prezidan FHF la ki se Yves Jn Bart ta vyole kèk jwèz minè k’ap pran fòmasyon nan sant FIFA Goal la nan Kwadèboukè. Poutèt sa 2 nan òganizasyon fanm nan peyi dAyiti ki rele “SOFA” ak “Kay Fanm” leve kanpe e mande jistis pou ti medam yo.
Depi aprè piblikasyon atik “The Guardian” jounal britanik lan jou ki te Jedi 30 Avril pase a ki ta akize nimewo 1 FHF la kòm moun kap vyole ti fi Ki gen pi piti ke 18 lane kap pran fòmasyon nan sant FIFA Goal la, nouvèl la gaye nan tout mond foutbòl la, anpil medya kòmanse ekri atik epi foure bouch nan koze sila. The Guardian yon jounal ki egziste depi nan lane 1821. Nan kelke mwa jounal sa pral genyen 200 lane egzistans. Menm ke prezidan Dadou ta deklare tèt li inosan, men anpil moun rete kwè se lajistis kap gen dènye mo a. Se pou rezon sa SOFA ak Kay Fanm deside pa rete ap dòmi sou dosye sa e mande jistis pou ti medam yo.
Nan yon kominike Ki soti samdi 2 Me a nan maten, SOFA ak Kay Fanm Ki se 2 òganizasyon Ki gen plis pase 30 lane depi aprè 3 Avril 1986 ap konstate endiyasyon fanm yo ki vle patisipe nan rekonstriksyon nasyon an ak eslogan “Fanm yo bezwen travay, yo pa bezwen randevou” vle pou lajistis eklèsi dosye vyòl kap fèt sou ti medam yo. Daprè SOFA ak Kay Fanm, atik kotidyen britanik lan ak videyo kap sikile sou entènèt montre aklè enstrimantalizasyon kap fèt anndan federasyon an ak kò ti medam yo ki ekspoze san ankenn pwoteksyon leta ni ankenn lòt granmoun, anba men predatè seksyèl k’ap pwofite pozisyon gwo chabrak yo pou satisfè move panchan. Yon lòt kote, SOFA ak Kay Fanm pale tou kote prezidan FHF la pa pè, pa krent chita devan kamera ap manyen yon jenn ti jwèz, pou yo bagay sa bay anpil kè sote e fè tout moun santi pa gen kòd kondwit ni prensip pwoteksyon pou règleman relasyon timoun kap viv anba lotorite dirijan federasyon sila a. Yo kontinye pou di, Dadou Jn Bart pa sèlman vòlò rèv jenn fi sa yo men tou inosans yo, e li demontre li pa ka kondui rèv jenès nou an nan diyite, men nan kalbenday kote talan, konpetans ak ladrès pa pale.
Pou yo fini, sou dosye sa SOFA ak Kay Fanm mande :
1- Leta peyi a pran tout mezi nesesè pou retire nan tèt federasyon foutbòl lan, mouche Dadou Jn Bart akoz gwo akizasyon kap peze sou tèt li kòm moun ki ta agrese seksyèlman yon bann jenn fi sou baz gwo ponyèt.
2- Ministè lajistis dilijante yon ankèt nasyonal endepandan ak konkou sosyete sivil lan ki dwe pran kouraj li nan men nan fouye zo nan kalalou pou konprann epi fè verite blayi sou tout move zak yo repwoche prezidan Jn Bart.
3- Komisè gouvènman mete prese prese aksyon piblik an mouvman dèyè mouche Jn Bart ak tout moun ki te pasitisipe nan zak malonèt sa yo.
4- Tout enstitisyon piblik ki konsène pou jwe wòl nan dosye sa.
5- SOFA ak Kay Fanm ankouraje tout jenn fi, tout fanmi tifi ki viktim mache kontre ak yo pou denonse ak ede yo depoze plent kont monche Jn Bart.
6- SOFA ak Kay Fanm envite tout moun Ki temwen move zak mouche Jn Bart yo pou vin kore temwayaj paran tifi ak jenn fi ki viktim yo.
7- SOFA ak Kay Fanm mande yon pwoteksyon rapwoche pou tout lòt jwèz ki nan ranch Kwadèboukè a jiskaske kriz Kowona a pase epi poze sele sou espas la annaprè.
8- Tout moun ki ta gen prèv videyo, papye ekri dwe pote kole pou verite blayi, Pwoteksyon Fanm ak tifi nan sosyete a se devwa tout sitwayen.
