Se pa yon sekrè pou pyès moun ke sa pa mache twò byen pou foutbòl pa bò lakay nou, sitou D2 ak D3 ke FHF la pa gen twòp zye sou yo. Kit se dirijan FHF, kit se dirijan klèb, sa konn rive pafwa yo kontribye nan move dewoulman konpetisyon yo. Sa klè.
Madi 14 Janvye 2020 an la, faz final pleyòf rejyon Wo plato a nan chanpyona twazyèm divizyon an tap jwe ant ekip FC Pignon an ak EPJA ki se yon jèn klèb Ench ke Ephraïm Lucien ki se mèt e antrenè li ap dirije. Match sa ki te fini 2-2 pliske aprè sèlman 20 minit nan jwèt la, EPJA te deja 2-0 men avan 45 minit premye mitan an fini, FC Pignon te egalize, match la ki ta pral rete konsa jiskase de ekip yo rive nan seyans tiwobi. EPJA genyen final la 5-4 e li vin otomatikman jwenn tikè pou patisipe nan pleyòf nasyonal D3 a.
L. Orlando Adema se youn pami jwè ki te aliye pou ekip EPJA a. Li se jwè FICA. Rodney Manigat ki ta va gen siyati li nan papye ki sètifye ke klèb Okap la prete EPJA jwè a demanti enfòmasyon an pandan li konfime ke non li pa ekri jan yo ekri li nan papye a, sa ta pral konfime nèt atò, lè mèt Jules François ki se sekretè jeneral FICA a te konfime ke se yon papye ki pa otantik. Plizyè lòt papye ki gen non federasyon an sou yo gen yon ekriti ki idantik pou tout prè yo.
Kisa règleman federasyon an di sou yon sitiyasyon konsa? Eske nou kapab kite foutbòl ki se espò plis moun renmen nan peyi a kapab evolye nan sitiyasyon sa? Antouka, gen bagay ki mande repanse.
