Par Ynel François
Avèk yon jenerasyon dore, Melchie, Nérilia, Roselord, Batcheba, Kerly, Roseline, Tabita, Ruthny elatriye… seleksyon ayisyèn nan rive ekri yon lòt paj istwa nan zafè foutbòl fanm, non sèlman nan zòn CONCACAF la men tou nan mond foutbòl la. Nan sans sa, Ayiti pral kapab jwe premye koup di monn li nan kategori senyò depi 1974.
Tan ale tan vini, seleksyonè chanje chak moman, Ayiti pat janm arive kalifye pou yon koup di monn senyò bò kote medam yo. Se ra se ta, ane sa a dezòd sa fini, Melchie Daëlle Dumornay avèk palto bitèz li make 2 gòl fas Chili nan final gwoup B baraj entèkontinantal la, pou ofri kalifikasyon an ak Ayiti, avèk Yon sèl diskou Oseyani nou prale.
Tout kòk kap batay pran kou, malgre Mèdam yo te rate chans lan yon premye fwa fas Jamayik aprè yo te fin pase men sou Meksik nan tounwa Konkakaf la nan mwa Jiyè ki sot pase la (3-0), Grenadyè yo te toujou di depi tèt pa koupe yo espere mete chapo, tout sa nou pa tire nan longè nap tire li nan lajè. Chòy di, chòy fèt, nan baraj entèkontinanl la, kapitèn Nérilia ak bann li yo kase met nan men tout sa yo jwenn sou wout yo.
Apre yo te fin donte lyòn peyi senegal yo (4-0), mèdam yo al tabose Chili avèk yon double de Melchie Daëlle Dumornay (45+1′ epi 90+8′). Avèk anpil pasyans, Nicolas Delépine ak twoup li yo ofri pèp ayisyen yon ti moso lajwa aprè kalifikasyon istorik sa.
Si nou poko konnen ki ane nap rewè seleksyon ayisyèn maskilen an nan mondyal senyò, ebyen medam yo ofri nou sa ane a pou rense zye nou pou ete kap vini la nan peyi Ostrali ak Nouvèl Zelann.
