Par Godson Sériphin
Nan yon entèvyou Jean Pierre Etienne te akòde ak Ayibopost, ki pibliye sou platfòm medya a jodi Madi 11 Dawou 2020 an, jounalis espòtif ke anpil moun renmen tande an, pale sou plizyè gwo bagay tankou idantite seleksyon nasyonal la, moman ki plis make li ak seleksyon an, onz (11) ideyal li ak enpak akizasyon jounal “The Guardian” ak kèk lòt bagay ankò.
Mwa me a te fenk ap kòmanse lè yon gwo jounal britanik te pibliye rezilta yon ankèt ke jounalis Romain Molina ak Ed Araons te mennen ki pale sou abi seksyèl kap fèt sou kèk jwèz nan ranch kwadèboukè a. Kèk mwa aprè, Jounalis Jean Pierre Etienne ki fenk soti yon liv ki rele «Au cœur des grenadiers», pale de enpak akizasyon sa yo ka genyen sou foutbòl la.
« Pou kriz efektivman ke federasyon an ap travèse la, kote lòm fò li, (prezidan Dadou) ki la depi yon ventèn dane akize abi seksyèl sou minè, li sètènman yon gwo kou pou imaj federasyon an. » Se konsa JPE te kòmanse entèvansyon li an sou dosye a.
Jounalis JPE te kontinye pou di ke limyè dwe blayi nan dosye sa. «Si misye (Dadou) koupab, fòl peye pou sa, sil pa koupab ke yo blanchil. » Se sa li ajoute.
«Menm si desizyon FIFA a ta soti pou destitye Dadou definitivman nan tèt federasyon an, mwen kwè ke foutbòl ayisyen an li pi gran ke Dadou Jan Ba, li te egziste avan Dadou, e lap egziste aprè Dadou e m espere menm ke lap pwogrese davantaj aprè Dadou. » Se sa JPE di poul te fini.
Nap raple w, sou sanksyon 90 jou ke la FIFA bay Dadou, pou l pa patisipe nan okenn aktivite foubòl, rete yon kenzèn pou li fini. Annatandan, ann rete swiv kisa ki pral pase.
